МЭНДЧИЛГЭЭ

МЭНДЧИЛГЭЭ

 Төр түмнийхээ төлөө зүтгэж явсан үе үеийн ахмадууд, эдүгээ энэ албанд бие сэтгэл, мэдлэг чадвараа дайчлан ажиллаж байгаа бүртгэлийн ажилтан, албан хаагчид, хамтран ажилладаг байгууллага, хамт олон, иргэд Та бүхэндээ Монгол Улсын Засгийн газрын нэрийн өмнөөс болон хувиасаа Улсын бүртгэлийн байгууллагын үүссэн түүхэн өдөр болон Улсын бүртгэлийн ажилтны өдрийн баярын халуун мэндчилгээг дэвшүүлье. БНМАУ-ын Ардын Сайд нарын зөвлөлийн 44 дүгээр тогтоолоор 1940 оны 11 дүгээр сарын 23-ны энэ өдөр “Иргэний паспортын дүрэм”-ийг анхлан баталж, “Паспортын хэлтэс” хэмээн байгуулагдсан Улсын бүртгэлийн байгууллага нь энэ үеэс эхлэн тєр засгийн бодлого шийдвэрийг амжилттай хэрэгжүүлж ирсэн баялаг түүхтэй билээ.

Энэхүү түүхэн хєгжлийн  хугацаанд Монгол улсын иргэн бүрийг паспортжуулан мэдээллийн сан бүрдүүлэх, иргэний гэр бүлийн байдлын бүртгэлийг хєтлєх, регистрийн дугаар,  иргэний үнэмлэх олгох, иргэдийн болон ємчийн олон хэлбэрийн хуулийн этгээдийг бүртгэх, тэдний эд хєрєнгийн ємчлєх эрхийг баталгаажуулах, цаасанд суурилсан бүртгэлээс цахим бүртгэлд, мэдээлэлд суурилсан бүртгэлээс биеийн давхцахгүй өгөгдлөөр баталгаажсан бүртгэлд шилжин, төрийн мэдээллийн нэгдсэн санг бий болгох зэрэг тєр засгийн томоохон бодлого, зорилтуудыг хэрэгжүүлж ирсэн түүхэн амжилт нь бүртгэлийн байгууллагын үе үеийн ажилтан албан хаагчид төдийгүй иргэд олон нийтийн үр бүтээлтэй хамтын ажиллагааны үр дүн байсныг онцлон тэмдэглэхэд таатай байна.

Цаашид Та бүхнийг Монгол Улсын төр, Засгийн газрын бодлого шийдвэрүүдийг амжилттай хэрэгжүүлэхэдхуулиархүлээсэнүүргээ биелүүлж, “Нэг иргэн-нэг бүртгэл” хөтөлбөр хэрэгжүүлэх замаар улсын бүртгэлийн үйл ажиллагааг боловсронгуй болгох, бүртгэлийн үйл ажиллагааг онлайн горимд бүрэн шилжүүлж, үндэсний цахим баримт бичгийн хэрэглээг нэмэгдүүлэх, төрийн үйлчилгээг  иргэд, олон нийт жигд тэгш авах нөхцөлийг бүрдүүлэх зэрэг томоохон шат дараатай арга хэмжээнүүдийг хэрэгжүүлэх нь бидний нэн тэргүүний зорилт болж байгаа юм.

Мөн үүний хамт мэдлэгт суурилсан эдийн засгийг хөгжүүлэх үндсэн түлхүүр болсон оюуны бүтээлийг баталгаажуулах, хамгаалах, үр өгөөжийг нь  нийгмийн хөгжлийн хүчин зүйл болгоход чиглэсэн үйл ажиллагаагаа улам бүр боловсронгуй болгон хөгжүүлэхэд онцгойлон анхаарах ёстой. Улсын бүртгэлийн үйлчилгээг шинэ шатанд гаргаж, нэгэн шинэ түүхийг бичилцэхээр хамтдаа гар бие, сэтгэл зүрхээ нэгтгэн, улс эх орон, иргэн бүрийн ирээдүйн сайн сайхны төлөө хичээл зүтгэл гарган ажиллаж яваа Та бүхнийхээ цаашдын ажилд өндөр амжилт,эрүүл энх, аз жаргал, хамгийн сайн сайхан бүхнийг хүсэн ерөөе.

Төрийн бүртгэл нягт, түмний үйлс дэлгэрэх болтугай.

 

              МОНГОЛ УЛСЫН ЗАСГИЙН ГАЗРЫН ГИШҮҮН,

             ХУУЛЬ, ЗҮЙ ДОТООД ХЭРГИЙН САЙД                                           С.БЯМБАЦОГТ

 

Хэрэглэгч танд

Өргөдөл гомдол Facebook Twitter

Харъяа агентлаг, байгууллагууд